ايام فى الحرام
ـ" اسكتش فكاهى "ـ
( يجلس شريف وحبيبته مروة فى احد الكازينوهات المطلة على النيل ويبدو على وجهه علامات الحزن والصدمة بعد ما اخبرته مروة ان مهندس ناجح قد تقدم لخطبتها ووالدها والعائلة كلها تبارك هذه الخطبة وتوافق عليها بإصرار رهيب وهى اضعف من تقف امام ارادة الجميع )
شريف : حُبنا لازم يعيش يا مروة .. فهمانى .. لازم يعيش .. مش لازم اى حاجة تموته
مروة : ( تستفسر ) ازاى .. ؟؟
شريف : ( يمزح ) نديله حقنة فيتامين
مروة : ( تتظاهر بالقيام ) شكلك فايق وبتهزر وانا مش فايقالك اساسا
شريف : ( يشير لها بالجلوس ) لا فايق ولا حاجة اقعدى يا مروة ، هى بس الأفيه حكمت ، معلش خُلصنا م الهزار نخش فى الجد
مروة : ياريت لإن دماغى مش فايقة والنبى للهزار بتاعك ده
شريف : شوفى يامروه مادام هما مصممين على العريس ده ، احنا بقى نحطهم أمام الأمر الواقع
مروة : مش فاهمة
شريف : نضرب ورقتين عرفى
مروة : ( فى اندهاش ) نعم يا اخويا
شريف : بلاش دى ، نتجوز جواز الدم ، او نسجل جوازنا على شريط كاسيت وكل واحد فينا ياخد نسخة .. إيه رأيك يامعلمة عندك تلت اختيارات اهو .. انى خيرتك فإختارى
مروة : ( تنظر له دون ان تتكلم نظرة عميقة يشوبها الغيظ )
شريف : لو الإختيارات صعبه عليكى انا ممكن احذفلك اتنين ولا اقولك انا حاستعينلك بصديق
( يجذب شريف تليفونه المحمول ويتصل بأحد اصدقاءه )
شريف : الو ازيك ياوائل ، وحياة ابوك حسألك حاجة وتجاوبنى عليها بسرعة عشان الوقت
وائل : أأمر يا معلم
شريف : الأمر لله وحده ، شوف يا شقيق .. انا عرضت على مروة تلت حلول عشان نحط اهلها قدام الأمر الواقع ، اصلهم عايزين يجوزوها مهندس إتقدملها ، فأنا عرضت عليها نضرب ورقتين عرفى ياإما نتجوز جواز الدم ، ياإما نسجل جوازنا على شريط كاسيت ، وكل واحد فينا ياخد نسخة .. وهى شكلها محتار ، فقلنا نستعين بصديق بدل ما نحذف اختيارين .. إيه رأيك يا معلم
وائل : شوف يا زميل انا رأيى جواز الدم اجدع حاجة ، لاتقولى جواز عرفى ولا شريط كاسيت ماهو اصل ده دليل عليك وطوق فى رقبتك يا معلم لو حبيت تخلع .. لكن جواز الدم قشطة ومفيش دليل لو هفتك نفسك تديها استمارة "6"
شريف : عندك حق .. هو ده .. الف شكر يا معلم .. سى يو يامان
( ينهى شريف المكالمة ويتحدث لمروة )
شريف : ( فى فرح ) وائل إختار لنا الحل المثالى
مروة : إيه اللى جرالك ياشريف انتا بتخلى اصحابك يتدخلوا فى حياتنا ليه .. إيه اللى إنتا بتعلموا معايا ده
شريف : إسمعينى بس يا قطه ، وائل ده خبره اساسا فى الحياة .. هو اقترح لنا جواز الدم ، هو اللى ينفع فى حالتنا دى .. وائل ده بتاع الحلول المثالية صدقينى
مروة : انا مش فاهمة حاجة .. ويعنى ايه جواز الدم ده ..
شريف : يعنى شكة دبوس فى صباع إيدك الصغير ونفس الشكه فى صباع إيدى الصغير ونخلط الدم بتاعك مع الدم بتاعى مع شوية كلام يتقال يا معلمة وتبقى حلالى على سُنة الله ورسوله ..
مروة : فكرك كده
شريف : وابو كده كمان
مروة : بس انا عمرى ما سمعت عن حد عمل كده .. انا خايفه ياشريف من الموضوع ده ، ماتشوف حل تانى
شريف : اولا الدنيا كلها بتعمل كده .. ثانيا انا خايف اكتر منك .. لكن كل ده عشان حبنا يعيش .. اهم حاجة إن حبنا يعيش
مروة : يعنى حبنا يعيش وسمعتى تموت ياشريف
شريف : السمعة دى بتييجى فى ثانية وتروح فى ثانية يا حبيبتى اهم حاجة الحب .. هو اللى يعيش .. خدى عندك .. إيه اللى خلى قيس وليلى تعيش حكايتهم لحد دلوقت ، وعنتر وعبلة ، وعبد الحميد ونرجس ، إيه غير الحب .. وبعون الله حايقولو شريف ومروة بس انتى ما تأطعيش
مروة : خلاص .. اعمل اللى انتى شايفه صح .. انتا عارف انا قد ايه بحبك وبثق فيك ياشريف
شريف : ( يلقى لها بوسه فى الهوا ) قشطه .. هو ده يا معلمه
( يتزوج شريف ومروة جواز الدم وبعد أن يأخذ غرضه منها يتركها بعد اسبوع واحد للفضيحة )
(( ستار ))
**************************************************
8 comments:
أيوة فكرت هكتب ايه
بجد انت مسكت مشكلة من مشاكل المجتمع يمكن انا دخلت الجامعة وخرجت منها ما شفتش أى حاجة من الحاجات ده والحمد لله انى ما شفتش علشان ما اكرهش الدنيا
مدونتك حلوة قوى
تحياتى
شيمو القمر
ايه ده
يا نهار ابيض كده على طول من غير تفكير
وبعدين مين نرجس وعبد الحميد دول
ابطال قصص غرام واحنا مسمعناش عنهم
بجد انت ناقشت كارثة حاصلة فى المجتمع بطريقة كوميدية
وكارثة اكبر اننا نغلك تحت مسمى احب
بحيييييييييك
انت ائع زى عادتك
احمد على نصار
حبيبي الشاعر الجميل شكرا علي كلماتك الذكية والناس الغلابة يمكن في يوم ينفضوا عن انفسهم غبار المذلة
بقلمك البارع استطعت ان تصور
البداية المنحلة للشابين والنهاية المريضة في مجتمع فاسد يحكمه الاهواء ولا ينظمه الا فعل الشيطان
لك تحياتى والسلام ، ولا سلام مع اليهود
ياريت لما تدخل عندى
وتقولى رأيك ايه
يهمنى اعرف رأيك فى الكلام ده بالذات
يمكن حسة انه كتير
ويمكن حساه قليل فعلا
بس فى النهاية التناقض اللى حساه اكتر منى
عشان كده يهمنى رأيك
شيماء جمال
حتى لو ماشفتيش يا شيماء فالكلام ده بيحصل سواء بقى فى الجامعة او برةالجامعة .. وربنا يستر البلد دى دخله على ايام ما يعلم بيها الا ربنا
تحياتى
طائر الليل الحزين
ايوه كده على طول امال انتى فاكره ايه
وبعدين مسمعتيش ازاى عن عبد الحميد ونرجس
ازاى
ازاى
تحياتى
بيرم المصرى
العم بيرم
اولا شكرا على اطراءك الجميل
اما من جهة الناس فلقد اخذو على الذل والهوان
لا امل
تحياتى
طاير الليل الحزين ..
مالك با منى فى ايه وايه التناقض ده
حاشوف واقول رأيى انشالله
تحياتى
Post a Comment