اهداء :: الى اى حد شايف نفسه فى الكلام ده
آخر الكلام . .
نفسى أخرج ..
من جوه نفسى وأصرخ
نفسى أشرخ ..
جدار الحزن اللى ياما عاش فيا
بقى حته منى ..
لكنى ..
معرفش ليه حاجة حايشانى
حاجة مسكانى ..
وخدانى ..
من نفسى ومنى
محوطانى
كسرانى
هزمانى
هو انا لسايا انا ..
ولا واحد تانى
نفسى أخرج ..
من جوه نفسى وأصرخ
نفسى ارفض ..
واشجب
واندد
نفسى اهدد
اى حد يعترضنى
او يحاول قتل حلمى
نفسى اغنى
ياه ..
من زمان مابقتش أغنى
مابقتش ادندن بأى حاجة
للدرجة دى مش محتاجة
إنى أغنى ..
ولا الكآبه ..
طغيانها آسر مالوش حدود
شبه سحابه ..
ماتعدى تمنع نور الشمس
ع الوجود
إمتى تعود يا زمن ..
زى ما كنت من زمن ..
كفاياك جحود ..
كفاياك جمود ..
كفاياك برود ..
وسيل دموع ..
يوجع ويلسع ..
ع الخدود
مابينتهى
تقولش حرب هيه
واليأس حشد م الجنود
آخر الكلام ..
يتقال إيه ..
لما الكلام يخلص ..
وكل يوم ينقص ..
عدد الحروف
ويتملى جوانا خوف ..
من شئ بعيد
ملامحه تايهة ع العيون
بقى شئ جنون ..
إنك تكون او لا تكون
مين اللى فينا عاقل..
ومن عايش فى دور مجنون
إختلط الحابل بالنابل
شئ هايل .. !!
لما الأكاذيب تتوه
وسط الحقايق
على فكرة مش مسطول انا
انا لسه فايق
هما مش حبة ثوانى
وشوية دقايق
قادرين يقلبوا الوضع للنقيض
واللى كان إنسان سعيد
تلقاه فى غمضة عين جريح
واللى محبوب من كل خلقه
بكلمة يصبح مكروه بغيض
مش ثابتة هى على وضع عارف
متغيرة ديما ..
متحيرة ديما ..
هو انتا مش شايف ..؟
اللى إتملت قصوره ..
كل نحيه فى البلد ..
فى كل المدن ..
ع الشاشة فى لحظة قدمنا إتعدم
وعندنا
يزيد عن ربع قرن ..
مستنيين
تغيير نظام وحيد عقيم
به محكومين
من غير ملل
ولا حد كل
ولا حد طالب بالتغيير وزن
ولا جه وقال
عايزين بقى نصرخ
نشرخ جدار الحزن
11 comments:
الكلام دا كان ممكن يكون اهداء ليا من فترة
ومش فترة بعيدة
لكن الحمدلله تخلصت منها
بس والله الكلام عجبنى جدا
واسلوبك بسيط وجميل قوى فى الكتابة
واصعب شئ ممكن يمر بيه الانسان انه يبقى مش عارف يلاقى نفسه
ويفضل يدور على نفسه
لحد لما يرجع تانى
واحيانا مبيرجعش تانى
هما مش حبة ثوانى
وشوية دقايق
قادرين يقلبوا الوضع للنقيض
واللى كان إنسان سعيد
تلقاه فى غمضة عين جريح
واللى محبوب من كل خلقه
بكلمة يصبح مكروه بغيض
فعلا والله فى كل ثانيه او دقيقه بيتقلب الحال للنقيض
نفسى الاقى تفسير لده زمان كانوا بيقولوا ياخبر بفلوس بكره ببلاش
دلوقتى ياخبر بفلوس بعد ثانيه او دقيقه ببلاش
زمنا بقى كله سرعه حتى فى تغيير الاحوال
*********
ولا حد طالب بالتغيير وزن
ولا جه وقال
عايزين بقى نصرخ
نشرخ جدار الحزن
لا فى كتير قالوا التغيير و زنوا فى الاخر اصبحوا فى خبر كان
حرام عليك
خليت دموعي تنزل وبحرقه
اقول ايه بس حلوة اوى طبعا
صادقه جدا و حاسه كل حرف فيها
كمان اسلوبك فى الكتابه بسيط و قوى فى نفس الوقت
ندا منير :
اهداء ليكى عجيب مع ان ملامح كتاباتك
بتقول غير كده خالص
وكتير بيدور على نفسه
ومحدش فلهم حاجه مولد بقى
ضد التيار :
فى زمن العجايب اللى احنا فيه كل شئ مباح
الكدب والخيانه والنفاق عادى عادى ومتاح
كيارا :
ليه كده يا كوكى
إلا دموع انتا بتقيدنى وبترغمنى ..ايه ده احنا حانغنى ولا ايه
منمونه :
شكرا يا منه وشئ حلوانك نكونى حاسها ونفسك تصرخى
its healthy
لا انا اقصد انه كان ينفع اهداء ليا من فترة
لكن مش اهداء ليا دلوقتى
فترة مريت بيها مكنتش عارفة الاقى نفسى
لكن حاليا ميعتبرش اهداء ليا خالص
ويمكن الفترة دى هو اللى ساعدتنى انى ابقى كدة
وابقى كويسة
قالو حرية و قالو سلام طلع كله و الله كلام
قلت ده حقي و عمري مفكر أرجع عنه و لو بالدم
قلت أنا لازم أجري و أغير كل احساس الناس بالهم
قلت أنا عمري محرضي أكون زي غيري و أنسي الكون
انسي رسالة ربي انسي ايماني و علمي..............
انسي كفاح الغير ؛انسي سراب التغير...............
وببساط كده أقدر أقول إن ده هدفي إني أكون انسانة
ايجابية بتكره أنصار السلبية.......................
Just Help Me To Be!
ما شاء الله أسلوبك فوق الوصف ...إل يالأمام
تحياتي
سلمي
Post a Comment